Una sa lahat mga kapatid, nais kong humingi ng paumanhin sa matagal na pagkakaantala ng mga posts ko dito sa weblog natin. Medyo nawala ang pokus ko sa weblog at naging busy sa iba’t ibang bagay tulad ng diskusyon sa mga miyembro ng iba’t ibang sekta. Pero pramis mga kapatid, magiging aktibo na ulit itong weblog natin.
Sakto ang pagiging aktibo ko ulit mga kapatid. Umpisa na ng Semana Santa o Holy Week. Kaya’t maaari ko kayong kuwentuhan sa kung ano ba ang kahulugan ng Semana Santa para sa akin.
Maraming mga batikos na naririnig mula sa ibang mga sekta sa labas ng Iglesia Katoliko ukol sa ating pamamanata sa Mga Araw ng Kuwaresma. Nariyan ang pagpuna ukol sa pag-iwas sa pagkain ng karne sa araw ng Biyernes Santo. Ang mga batikos ukol sa pagtitika at pananahimik ng mga katoliko mula Huwebes Santo hanggang Sabado De Gloria. Malimit din nating maririnig ang walang sawang pagbatikos sa mga pabasa ng Pasyon, sa senakulo, sa mga seremonya sa loob ng simbahan sa mga araw na ito, atbp. Ang tanong na lagi kong nasa isip ay ito. Naiintindihan nga kaya ng mga kritikong ito ang mga seremonyas na ginagawa nating mga katoliko tuwing semana santa? Kasi sa aking pakiwari, mukhang hindi eh.
Ang pinakamadalas na batikusin ay ang pag-iwas natin sa pagkain ng karne tuwing Biyernes Santo. Karamihan ay nagsasabi na ito raw ay doktrina ng demonyo. Sinasabi raw kasi sa biblia na ang pagbabawal sa pagkain ng kahit na anong uri ng pagkain ay aral ng diyablo. Ang tanong, naintindihan ba nila ang sinasabi nilang aral ng diyablo ayon sa biblia?
Ang ipinagbabawal sa biblia ay ang pagtatalaga ng mga dokrtina ng pananampalataya na nagsasabing bawal kainin ang isang uri ng pagkain. Ito ay sa kadahilanang sinabi ni Apostol Pablo Ito ay sapagkat ang lahat na nilikha ng Diyos ay mabuti, na dapat tanggaping may pasasalamat at hindi ito dapat itakwil. Ito ay sapagkat pinaging-banal ang mga ito sa pamamagitan ng salita ng Diyos at panalangin( I Timoteo 4:4-5). Ang doktrina ng pag-iwas sa pagkain ng karne sa araw ng Biyernes ay hindi doktrina ng pananampalataya. Ito ay doktrina ng disiplina o isang tradisyon ng debosyon upang makiisa sa naging paghihirap ng Panginoon HesusKristo noong unang Biyernes Santo. Parang ganito iyan kapatid, sa isang pamilya, sinabi ng ama ng tahanan na hindi pwedeng kumain ng hapunan kapag wala pa ang lahat ng miyembro ng pamilya. Hindi siya isang utos dahil sa ito ang pinaniniwalaan ng lahat bagkus, ito ay isang utos ng ama bilang tagubilin para sa pananatili ng kaisahan ng buong pamilya. Samakatuwid kapatid, malinaw para sa akin na ang sinasabi ng mga bumabatikos sa debosyon ng di pagkain ng karne tuwing Biyernes ay bunga ng kanilang kawalang alam sa tunay na pinagmulan ng nasabing debosyong katoliko.
Bukas ko na itutuloy ang diskusyon natin sa Semana Santa, Kapatid. Hanggang sa muli.
God bless!
